Personi kontaktues: Xhavit Rexhaj

QASJA TËRËSEKTORIALE NË ARSIM

Në maj të vitit 2009, Zyra Ndërlidhëse e Komisionit Evropian (ECLO) në Prishtinë shpalli tender për projektin 3-vjeçar “Përkrahja për implementimin e qasjes tërësektoriale në arsimin e Kosovës” me qëllim që t’i ofrojë ndihmë Qeverisë së Kosovës për ofrimin e shërbimeve më cilësore në arsim. Në fakt, vet ndihma është pjesë e pakos së përkrahjes IPA 2008 për të ndihmuar aderimin më të shpejtë të vendit në Bashkimin Evropian. Vet tenderi ishte i tipit të kontratës për shërbime me terma specifike të referencës të hartuara nga ECLO, ndërsa KEC aplikoi si pjesë e konsorciumit të udhëhequr nga Cambridge Education Ltd, duke arritur paraprakisht marrëveshje, që, në rast të fitimit të këtij tenderi, të mbajë përgjegjësinë për organizimin e zyrës së projektit dhe për sigurimin e ekspertizës vendore. Pas shpalljes së rezultatit, kontrata për implementim u nënshkrua në shtator, ndërsa implementimi filloi më 20 tetor 2009.

Objektivat dhe aktivitetet e Projektit.

Siç u theksua më lartë, qëllimi kryesor i këtij projekti është të përkrahet Qeveria e Kosovës në përmirësimin e cilësisë dhe efikasitetit të arsimit dhe shërbimeve të trajnimit, në veçanti në fushën e arsimit parauniversitar, nga këndvështrimi i arsimit gjatë gjithë jetës dhe perspektivës së punësueshmërisë, në harmoni me qasjen e dakorduar tërësektoriale në arsim dhe në përputhje me standardet e BE.

Projekti ka tri komponenta kryesore:
1) Ndërtimi i kapacitetit.– Ndërtimi dhe forcimi i kapacitetit të MASHT për të menaxhuar sektorin e arsimit, me përkrahje të koordinuar të donatorëve partnerë, si dhe për të parashikuar në mënyrë efektive financimin e sektorit dhe për të monitoruar progresin e implementimit të strategjive në sektorin e arsimit.
2) Zhvillimi i kurrikulit.– Të rishikohet dhe të zhvillohet drafti i Kornizës së Kurrikulit përfshirë ndërtimin e kapacitetit dhe trajnimin e zhvilluesve të kurrikulit dhe palëve të tjera me interes, e në përputhje me nevojat për implementimin e kurrikulit të ri.
3) Trajnimi i mësimdhënësve.– Rishikimi dhe elaborimi i mëtutjeshëm i Standardeve të Mësimdhënies dhe i katalogut të programeve të trajnimit për mësimdhënës, si dhe ndërtimi i kapacitetit për zhvillimin e politikave të trajnimit të mësimdhënësve me qëllim të nxitjes së përmirësimit të cilësisë në arsimin fillor dhe të mesëm në Kosovë.

Për secilin prej këtyre aktiviteteve, me terma të referencës janë paraparë aktivitete të caktuara, të cilat kanë mundur të rishikohen në fazën fillestare. Vet oferta e prezantuar nga Konsorciumi i ka bërë disa ndryshime dhe plotësime, duke parashikuar mundësinë që, pas fillimit të projektit dhe analizës fillestare të situatës të bëhen edhe ndryshime të tjera.
Në total, projekti parasheh 1,150 ditë pune për dy ekspertët kyç dhe 2,206 ditë pune për ekspertë të tjerë, afatshkurtër dhe afatgjatë, prej të cilave 1,318 ditë për ekspertë lokalë.

Të arriturat kryesore të Projektit

Nga 20 tetori - dita e fillimit të projektit përqendrimi ka qenë në krijimin e Zyrës së Projektit, e cila ka qenë plotësisht funksionale më 8 nëntor, si dhe në analizën fillestare të situatës, e cila ka rezultuar me hartimin e raportit fillestar që është akoma në pritje të aprovimit zyrtar nga ECLO dhe MASHT. Ky raport është hartuar pas konsultimeve në bazë të gjerë me të gjitha palët relevante me interes, përfshirë komunitetin e donatorëve, dhe ofron një plan të zbatueshëm për realizimin e projektit. Pritet që aktivitetet e Projektit të fillojnë menjëherë pas aprovimit të raportit.
 

Ky projekt financohet nga Bashkimi Evropian dhe menaxhohet nga  

Zyra Ndërlidhëse e Komisionit Evropian në Kosovë (ECLO)