Personi kontaktues: Ardita Kabashi-Hima

KOSOVISION CONTEST

KOSOVISION CONTEST është një projekt arsimor në formë të një gare kombëtare që përcillet nga media i cili filloi në shtator të vitit 2008 dhe zgjat deri në maj të vitit 2011. Koncepti u zhvillua nga Universiteti i Edukimit në Cyrih të Zvicrës, ndërsa për herë të parë u realizua në vitin 2007 në Regjionin e Prizrenit, në bashkëpunim me KFOR-in. Pjesëmarrës në këtë projekt janë të gjitha klasat e pesta në Kosovë së bashku me mësimdhënësit e tyre të cilët merren me të tashmen dhe të ardhmen e Kosovës.
Ky projekt realizohet në bashkëpunim me Ministrinë e Arsimit, Shkencës dhe Teknologjisë, Qendrën për Arsim e Kosovës dhe Radio Televizionin e Kosovës.

Projekti financohet nga:

• DEZA, Drejtorati për zhvillim dhe bashkëpunim;

• Fondet e lotarive të Kantonit të Cyrihut;

• Fondacione private;

• Persona privat dhe ndërmarrje nga diaspora;

• Universiteti i Edukimit, Cyrih

Objektivat dhe aktivitetet e Projektit

Ky projekt u mundëson fëmijëve që duke marr pjesë në këtë projekt të kontribuojnë për të ardhmen e vendit të tyre. Ata inkurajohen që ti shprehin vizionet e tyre dhe të bëhen aktiv.
Për nga përmbajtja, fëmijët janë marrë me tema nga mjedisi i tyre jetësor. Ato janë: arsimimi, infrastruktura dhe mjedisi, ekonomia dhe bashkëjetesa në Kosovë.
Projekti u dedikohet në radhë të parë të gjithë fëmijëve të klasave të pesta, pra mosha 11 dhe 12 vjeç nga të gjitha grupet etnike (shqiptarë, boshnjakë, goranë, romë, serbë dhe turq). Me anë të këtij projekti, preken edhe grupet tjera si: mësimdhënësit e klasave të pesta, udhëheqësit e shkollave, prindër dhe pjesa tjetër e popullatës.

 

Aktivitetet e projektit janë:

1. Punëtoritë – Personeli mësimor zhvilloi punëtori bashkë me nxënësit lidhur me të tashmen dhe të ardhmen e Kosovës.

2. Vlerësimi Rajonal dhe shpallja e fituesve – Në shtatë Rajonet e Kosovës (Prishtinë, Pejë, Gjakovë, Prizren, Mitrovicë, Gjilan e Ferizaj) janë vlerësuar punimet e nxënësve. Pas vlerësimit të punimeve është bërë edhe shpallja e fituesve në secilin Rajon të Kosovës.

3. Shpërblimi i punimeve – 135 punimet më të mira nga të gjitha Rajonet e Kosovës janë shpërblyer (50 në vitin 2008 dhe 85 në vitin 2009). E gjithë kjo ceremoni është përcjell edhe nga Media.

4. Ekspozita – Në Prishtinë është bërë edhe ekspozita e rreth 1,200 punimeve nga të gjitha klasat pjesëmarrëse në projekt. Ekspozita ishte në dispozicion për të interesuarit për pesë ditë radhazi.

5. Realizimi i projekteve - në këtë fazë bëhet realizimi i ideve të cilat kanë dal nga punëtoritë e fëmijëve. Në këtë fazë do të punohet vetëm me klasat fituese të këtij projekti. Këto projekte udhëzohen dhe përkrahen nga mësimdhënësit. Organizohet takime me mësimdhënës ku ata do të bëjnë përshkrimin për secilin projekt dhe nga një plan projekti.

6. Ndarja e shpërblimeve për projektet – pas realizimit të projektit, vjen një fazë tjetër ku edhe bëhet vlerësimi i tyre. Edhe kjo fazë mbikëqyret dhe vlerësohet nga ekipe vlerësuese në të gjitha Rajonet e Kosovës. Pas vlerësimeve do të zgjidhen disa projekte më të mira të cilat do të shpërblehen sërish për punën e bërë. I gjithë ky aktivitet përcillet nga media.

7. Nderimi – Pasi të kenë përfunduar të gjitha aktivitetet e parapara me projekt, vizitohen klasat fituese nga një delegacion i cili bën nderimin e këtyre klasave për punën e bërë.

 

Cikli i parë i projektit u zhvillua në periudhën shtator 2008-maj 2009 dhe gjatë tij u realizuar të gjitha aktivitetet e përshkruara më sipër. Ndërkaq, në gusht të vitit 2009 filloi cikli i dytë i projektit, i cili karakterizohet me këto të arritura:

Punëtoritë – Personeli mësimor ka zhvilluar punëtori bashkë me nxënësit lidhur me të tashmen dhe të ardhmen e Kosovës, në bazë të temave të dhëna në projekt. Punëtoritë kanë zgjatur nëntë javë ku nxënësit kanë dizajnuar postera (pllakate) së bashku me idetë dhe paramendimet e tyre lidhur me të ardhmen. Ata kanë përshkruar në formë të projektit ideor kontributin, të cilën klasa do të mund ta jepte për realizimin e këtij projekti. Gjithsej pjesëmarrës në këtë projekt ishin rreth 1200 klasa të pesta nga mbarë Kosova.

Vlerësimi Rajonal dhe shpallja e fituesve – Në shtatë Rajonet e Kosovës ( Prishtinë, Pejë, Gjakovë, Prizren, Mitrovicë, Gjilan e Ferizaj) janë vlerësuar punimet e nxënësve në bazë të kritereve të dhëna nga hartuesit e projektit. Vlerësimet janë bërë nga grupe vlerësuese, ku secili Rajon ka pasur një grup me nga tre ose pesë persona për vlerësim. Këta vlerësues kanë qenë të profileve të ndryshme si: piktor, prindër, drejtues shkollash por edhe zyrtarë të Arsimit e mësimdhënës. Pas vlerësimit të punimeve është bërë edhe shpallja e fituesve në secilin Rajon të Kosovës. Janë zgjedhur 85 klasa fituese të cilët vazhdojnë garën edhe në fazën e dytë të projektit.

Shpërblimi i punimeve – 85 punimet më të mira nga të gjitha Rajonet e Kosovës janë shpërblyer. Po ashtu, secila klasë pjesëmarrëse në projekt është pajisur me një certifikatë e cila dëshmon punën dhe kreativitetin e fëmijëve pjesëmarrës në garë. E gjithë kjo ceremoni është përcjell edhe nga Radio Televizioni i Kosovës ku po atë ditë është bërë edhe tërheqja për tre fitues të rastësishëm në nivel të Kosovës. Ata janë: Shkolla “Naim Frashëri”, Prishtinë – klasa V4 me mësuesen Remzije Baraku, Shkolla “Ruzhdi Xhyliqi”, Marali-Malishevë – klasa V me mësues Skender Paqarizi, Shkolla “Trepça”, Banjë e Pejës – klasa V1 me mësuesen Mehrije Buleshkaj-Haxhijaj. Fituesit e rastësishëm do të kenë fatin që nxënësit e tyre ti shpërblejnë me një pushim të shkurtër dimëror.

Ekspozita – Në Prishtinë është organizuar ekspozita e punimeve e të gjitha klasave pjesëmarrëse në projekt. Ekspozita ishte në dispozicion për të interesuarit për pesë ditë radhazi. Pjesëmarrja e madhe e vizitorëve, respektivisht fëmijëve në ekspozitë ka zgjuar kureshtje edhe më të madhe për nxënësit që edhe më tutje të vazhdojnë me projekte të tilla siç është KOSOVISION CONTEST.

Në këtë projekt janë angazhuar një numër i konsiderueshëm i njerëzve (12 persona) të cilët ndihmojnë në realizimin e projektit. Varësisht nga numri i klasave të pesta nëpër komuna, është bërë edhe zgjedhja e personave (një ose dy persona në Rajon) të cilët punojnë në projekt dhe të cilët kanë dhënë kontribut të jashtëzakonshëm për mbarëvajtje sa më të mirë të punës.
 

Për më shumë informata:

http://www.kosovision.org/