Personi kontaktues: Petrit Tahiri

AVANCIMI I MËSIMDHËNIES SË HISTORISË

Përfundimi i shpërbërjes së ish-Jugosllavisë dhe krijimi i shteteve të reja në Ballkan në njërën anë, si dhe përafrimi me frymën e Bashkimit Evropian në anën tjetër, sjell domosdoshmërinë e bashkëpunimit rajonal dhe shmangies së barrierave në mes të kombeve. Krijimit të një fryme bashkëpunimi, paqeje dhe mirëkuptimi në mes të vendeve në rajon mund t’i kontribuojë dhe mësimi i lëndës së Historisë përmes përfshirjes së temave që kanë për qëllim kultivimin respektit reciprok mes kombeve.
Në Kosovë është krijuar një frymë ideale për implementimin e një projekti të tillë. Qeveria e Kosovës po ndërton një politikë të tolerancës ndëretnike, të bazuar në interesat e qytetarëve pa dallim nga përkatësia etnike apo religjioze. Bashkëpunimi me fqinjët është në agjendën politike të qeverisë, prandaj kjo situatë duhet të shfrytëzohet dhe t’i jepet impuls përmes ndërmarrjeve të ndryshme në fushën e arsimit.

Objektivat dhe aktivitetet e Projektit

Synimi i përgjithshëm i këtij projekti është Të krijohet një klimë e re në mësimin e lëndës së historisë, përmes trajtimit krahasues të fakteve historike që ndërlidhen me marrëdhëniet mes popujve të Ballkanit.
Qëllimi: të ndërtohen kapacitete në mesin e mësimdhënësve të historisë për të përfshirë burime historike nga vende të ndryshme, në shtjellimin e temave historike të caktuara.

Aktivitetet e projektit në vitin 2008
Në kuadër të këtij projekti janë paraparë të zhvillohen këto aktivitete
1. Organizimi i trajnimit për trajnerë
2. Ofrimi i materialeve shtesë për secilin pjesëmarrës në trajnim, të cilat ndihmojnë shtjellimin e njësive të caktuara që janë pjesë e plan-programit të lëndës së Historisë:
• Perandoria Osmane
• Kombet dhe shtetet ne Evropën Juglindore
• Luftërat Ballkanike
• Lufta e Dytë Botërore
3. Certifikimi i trajnerëve

Aktivitetet e projektit në vitin 2009
1. Organizimi i trajnimit në Prizren në muajin shkurt.
2. Zhvillimi ideve të reja, për të siguruar vazhdimësinë e projektit
3. Angazhimi i dy eksperteve ndërkombëtarë për metodologji të mësimdhënies, për të hartuar doracakun e trajnimit
4. Hartimi i Doracakut dhe programit të trajnimit
5. Përkthimi i doracakut në gjuhën shqipe dhe boshnjake.

Të arriturat kryesore të Projektit

Në qershor vitit 2008 u mbajt trajnimi i parë në kuadër të këtij projekti. Qëllimi i këtij trajnimi ishte, prezantimi i kompletit të librave alternative për mësimin e lëndës së Historisë, si dhe prezantimi i disa mësimeve model, mësime këto të hartuara në bazë të teksteve bazike dhe atyre alternative. Çështja e mënyrës së të shkruarit dhe interpretuarit të historisë në Ballkan është një çështje mjaft e ndjeshme, andaj, ky trajnim u shikua me një skepticizëm nga pjesëmarrësit sado që këto libra janë vetëm libra alternative. Megjithatë, kontributi i pjesëmarrësve dhe në përgjithësi komentet karshi këtyre librave ishin pozitive.
Në muajin dhjetor të viti 2008, u organizua edhe një trajnim për trajnerë, me qëllim që pjesëmarrësit të ngritën në nivelin e trajnerit, dhe njohuritë e fituara pastaj t’i zbatojnë në trajnimet e ardhshme. Në këtë trajnim morën pjesë 26 mësimdhënës, pjesa dërmuese e tyre mësimdhënës të lëndës së historisë, mirëpo kishte edhe disa student që janë duke i zhvilluar studimet master në lëmine e historisë.

Në muajin shkurt të vitit 2009, në Prizren u organizua edhe një trajnim tjetër me mësimdhënësit e historisë të kësaj komune. Edhe pse ishte e paraparë që trajnimi të zhvillohet me 25 mësimdhënës të historisë, ishte befasuese që në trajnim morën pjesë 34. Trajnimi kaloi në frymë shumë pozitive, librat e prezantuar ishin një risi për shumicën e mësimdhënësve.
Në bashkëpunim me partnerin implementues u hartua një projekt i ri, ku fokusi kryesor binte në metodologjinë e mësimdhënies së historisë. Projekti ka gjetur përkrahjen e donatorëve dhe në tetor ka filluar implementimi. Deri më tani janë zhvilluar këto aktivitete:
• Janë angazhuar dy ekspertë ndërkombëtarë për metodologji të mësimdhënies, për të hartuar doracakun e trajnimit
• Është hartuar Doracaku dhe programi i trajnimit
• Është përkthyer doracaku në gjuhën shqipe dhe boshnjake.

Trajnimet u vlerësuan mjaft shumë nga pjesëmarrësit, madje, u shfaq kërkesa edhe për trajnime tjera të ngjashme. Karakteristikë e këtyre trajnimeve ishte bashkëpunimi shumë i mire në mes të pjesëmarrësve dhe trajnerëve.
Edhe pse çështja e mënyrës së shkrimit dhe interpretimit të historisë në vendet e Ballkanit është një çështje mjaft e ndjeshme, pjesëmarrësit në këto trajnime u treguan shumë mendjehapur dhe duhet çmuar maksimalisht komentet, inputet, sugjerimet dhe debatet e zhvilluara gjatë gjithë kohës. Është shumë me rëndësi që me ndihmën e donatorëve është siguruar qëndrueshmëria e këtij projekti.

Gjatë vitit 2010 do të organizohen edhe një varg aktivitetesh të tjera, me qëllim të ngritjes së kapaciteteve të mësimdhënësve të historisë.