Personi kontaktues: Hana Zylfiu-Haziri

Hap pas hapi
 

Hap pas hapi në nivel ndërkombëtar

Rrjeti i Fondacionit SOROS dhe Children's Resources International krijuan programin Hap pas hapi në vitin 1994, i cili filloi zhvillimin e tij në shumë shtete në transicion. Deri më sot, programi Hap pas hapi aplikohet në 31 shtete .Të gjitha këto shtete në vitin 1999 themeluan asociacionin ndërkombëtar Step by Step (ISSA) http://www.issa.nl, me seli ne Budapest, Hungari.
Hap pas hapi është program edukativ, i cili filloi si metodologji parashkollore, mirëpo tani i qaset të gjitha niveleve shkollore: institucioneve parashkollore, klasave parafillore në kuadër të shkollave fillore, shkollave fillore, dhe arsimimit të mësimdhënësve.


Ky program përkrah:

• Individualizimin në mësimdhënie, për ta arritur potencialin për zhvillim të plotë te çdo individi në aspektin psiko-social, fizik dhe shoqëror, duke e respektuar mënyrën e të nxënit, temperamentin dhe interesimet e fëmijës.

• Të nxënit aktiv dhe bashkëveprues (puna në grupe dhe çifte)

• Zhvillimin e pavarësimit të fëmijës, ndjenjën e përgjegjësisë, respektit ndaj vetvetes dhe vetëbesimit.

• Planifikimin tematik për punë edukative

• Motivacionin dhe frymëzimin e ambientit ku mësohet, duke përfshirë këtu edhe materialet dhe mjetet për mësim

• Bashkëpunimi me anëtarët e familjes dhe rrethin (komunitetin)

• Përfshirja e fëmijëve me nevoja të veçanta në punë educative
   

Hap pas hapi në Kosovë

Objektivat e Programit

• Ngritja e kapacitetit dhe qëndrueshmërisë së rrjetit të trajnerëve dhe mentorëve.

• Krijimi i rrjetit të komunitetit, mësuesve, institucioneve parashkollore dhe shkollave të programit Hap pas hapi.

• Përkrahje efektive e MASHT-it për zhvillimin e politikave për fëmijërinë e hershme.

• Forcimi i kapacitetit drejtues të ekipit të programit Hap pas hapi.

• Ngritja e kualitetit të punës në klasat e programit Hap pas hapit.

• Pjesëmarrja e minoriteteve në trajnimet e programit Hap pas hapi.

• Zgjerimi i rrjetit të klasave të programit Hap pas hapi në klasat parafillore

• Zgjerim i rrjetit të klasave të programit Hap pas hapi në shkolla fillore

• Bashkëpunimi me familjet dhe rrethin në procesin e edukimit

• Trajnime dhe punëtori të vazhdueshme

• Monitorimi i klasave të cilat punojnë me metodologjinë Hap pas hapit

• Krijimi i rrjetit të institucioneve të cilat punojnë me metodologjinë Hap pas hapi

• Bashkëpunimi me institucione dhe organizata të tjera në fushën e edukimit
  
   

Aktivitetet dhe të arriturat e programit

Në Kosovë programi Hap pas hapi filloi në vitin 1997. Në mars të vitit 2002 programi Hap pas hapi u transferua nga Fondacioni Kosovar për Shoqëri të Hapur (KFOS) në Qendrën për Arsim të Kosovës. Ky program bashkëpunon me shumë organizata siç janë: UNICEF, Save the Children, IRCCRC, Feed the Children, ABS, Diakonia, SOS Kinderdorf, Caritas, Every Child dhe AGEF.

Sivjet programi Hap pas hapi zhvillohet në 34 institucione parashkollore me 269 dhoma pune (duke përfshirë grup moshat 0-3 vjet dhe 3-6 vjet), 514 klasa parafillore në kuadër të shkollave fillore dhe 13 shkolla fillore me 54 klasa, ku punojnë 102 paralele. Të gjitha këto klasa janë të pajisura me inventar sipas standardeve të programit. Në mesin e klasave parafillore, 10 prej tyre janë klasë të minoriteteve (romë, boshnjakë, turq), si dhe dy kopshte që punojnë me fëmijë serb në veri të Mitrovicës.

Janë themeluar tri qendra trajnimi në Kosovë: në Prishtinë, Pejë dhe Prizren. Në këto qendra mbahen rregullisht seminare të ndryshme për personelin arsimor dhe mbledhje për prindër. Programi ka arritur të organizojë trajnime fillestare dhe të avancuara për mësimdhënës nga e tërë Kosova. Deri me sot rreth 3000 mësimdhënës dhe edukatorë janë trajnuar për metodologjinë Hap pas hapi për nivele të ndryshme.

Në Kosovë pjesëmarrja e fëmijëve në edukim në fëmijërinë e hershme është jashtëzakonisht e ulët, krahasuar me vendet në Rajon. Varfëria dhe kushtet e përgjithshme dëshpëruese kanë bërë që fëmijët e kësaj moshe të mbesin në shtëpi me nënat e tyre ose anëtarët e tjerë të familjes. Megjithëkëtë, programi Hap pas hapi u kyç me sukses në klasat parashkollore, në të cilat zakonisht fëmijëve u imponohej disiplinë e rreptë në klasat e hirta, të cilat nuk ishin aspak tërheqëse për fëmijët. Programi Hap pas hapi, duke iniciuar reforma në sistemin shkollor që nga fillimi i hershëm i edukimit, nxiti rritjen e vetëdijes për nevojën e reformimit të sistemit shkollor për ta ndërtuar një shoqëri të suksesshme, demokratike dhe tolerante për të ardhmen. Duke synuar ta vejë kriterin e rritjes së individëve të lirë për të ardhmen, ai e formon një sistem të arsimit, i cili drejtpërdrejt i kontribuon zhvillimit të një shoqërie të shëndoshë civile, të një rritjeje efikase dhe përmirësimit të tendencave pozitive në shoqërinë kosovare.