Personi kontaktues: Ardita Kabashi-Hima

Promovimi i të Drejtave të Fëmijës në Fushën e Arsimit

Qendra për Arsim e Kosovës zbaton projektin “Promovimi i të drejtave të fëmijës në fushën e arsimit” që nga janari i vitit 2009. Financues i këtij projekti është: Zyra Ndërlidhëse e Komisionit Evropian në Kosovë (ECLO) - Instrumenti për Demokraci dhe të Drejtat e Njeriut ( EIDHR). Projekti bashkë financohet nga Fondacioni Kosovar për Shoqëri të Hapur (KFOS) ndërsa partner në implementim është Shoqata Kosovare për të Drejtat e Njeriut dhe Fëmijës (KAHCR). Projekti zbatohet në Rajonin e Prishtinës, dhe Prizrenit, respektivisht në komunat Prishtinë, Fushë Kosovë, Prizren dhe Dragash, dhe do të zgjas 30 muaj.

Objektiva e përgjithshme e projektit është të kontribuohet në zhvillimin e demokracisë në Kosovë duke mobilizuar shoqërinë civile dhe palët tjera të interesit që të nxisin respektimin e të drejtave të fëmijës në fushën e arsimit.

Objektiva specifike e projektit është të rritet vetëdija për situatën e të drejtave të fëmijës në fushën e arsimit në Kosovë, duke organizuar veprim të bashkërenduar monitorimi të shoqërisë civile në kooperim me autoritetet qendrore dhe lokale, si dhe duke krijuar kapacitetin e shkollave që të kontribuojnë në këtë përpjekje.

Rezultatet e pritura të këtij projekti janë: 1) Zhvillimi i një sistemi të monitorimit dhe 2) Raportimi i situatës së të drejtave të fëmijës në fushën e arsimit dhe përgatitja e pakove të trajnimit për të drejtat e fëmijës dhe evokimin për nxënës.

Për ti arritur këto rezultate bëhen aktivitete të ndryshme. Për rezultatin e parë janë paraparë këto aktivitete:
- Zgjedhja e shkollave të synuara për monitorim dhe shkollat e grupit kontroll;
- Përpunimi i një kornize të monitorimit;
- Aftësimi i monitorëve
- Monitorimi i situatës së të drejtave të fëmijës në fushën e arsimit;
- Përgatitja dhe prezantimi i raporteve të monitorimit.

Ndërsa për rezultatin e dytë janë paraparë këto aktivitete:
- Formimi/mobilizimi i komiteteve për të drejtat e fëmijës në shkollat e synuara;
- Organizimi i trajnimit për nxënës dhe mësues;
- Organizimi i aktiviteteve vetëdijesimi;
 

Aktivitetet

1. Zgjedhja e shkollave të synuara për monitorim dhe shkollat e grupit kontroll.– Gjithsej janë zgjedhur 30 shkolla të grupit të synuar dhe 30 shkolla të grupit kontroll nga 4 komunat. Përzgjedhja e shkollave është bërë në bashkëpunim me Drejtoritë komunale të komunave përfituese në projekt duke u bazuar në kriteret e dhëna në projekt. Gjatë procesit të zgjedhjes së shkollave, jemi fokusuar në shkollat të cilat kanë të funksionalizuara komitetet shkollore ose te shkollat ku këto komitete kanë funksionuar më herët por që tani nuk funksionojnë. Vëmendje e kushtuar u është dhënë edhe shkollave të cilët kanë nxënës të minoriteteve dhe atyre me nxënës me nevoja të veçanta. Në secilën prej këtyre shkollave janë zgjedhur nga dy mësimdhënës të cilët do të punojnë aktivisht me komitetet shkollore, pra monitorë të brendshëm të shkollave. E gjithë kjo punë do të ndihmohet edhe nga monitorët e jashtëm e që gjithsej janë 6. Tre prej tyre do të veprojnë në komunat Prishtinë dhe Fushë Kosovë dhe tre prej tyre në komunat Prizren dhe Sharr.

2. Zhvillimi i kornizës gjithëpërfshirëse për monitorimin e të drejtave të fëmijës në arsim.– Qendra për Arsim e Kosovës ka angazhuar dy ekspertë të arsimit të cilët fillimisht kanë bërë hulumtime për të drejtat e fëmijës dhe mënyrës së bërjes së kornizës së monitorimit. Pas analizave të bëra është ftuar një grup pjesëmarrësish në një punëtori dy ditore të cilët kanë ndihmuar në zhvillimin e kësaj kornize të monitorimit. Pas mbledhjes së të dhënave dhe ideve të marra nga grupi, ekspertët kanë përpiluar kornizën gjithëpërfshirëse të monitorimit e cila tani shërben për punën e mëtutjeshme në projekt. Kjo kornizë monitorimi është përkthyer edhe në gjuhën boshnjake, turke dhe angleze.


3. Aftësimi i monitoruesve dhe organizimi i monitorimit.– Në bazë të kornizës për monitorim është bërë edhe aftësimi i monitoruesve të brendshëm dhe atyre të jashtëm për mënyrën e monitorimit në shkolla. Ky aftësim ka zgjatur dy ditë për secilën komunë. Duke u bazuar në metodologjinë e monitorimit situata e të drejtave të fëmijës në fushën e arsimit do të monitorohet në shkollat e synuara dhe ato të grupit të kontrollit. Ky monitorim do të bëhet katër herë. Këtë vit është bërë monitorimi i parë dhe i dyti do të bëhet në muajin mars të vitit 2010 kur edhe publikohet, prezantohet dhe diskutohet raporti për mbarëvajtjen e monitorimit.

Ky projekt financohet nga Bashkimi Evropian dhe menaxhohet nga  

Zyra Ndërlidhëse e Komisionit Evropian në Kosovë (ECLO)