Personi kontaktues: Melinda Mula

Projekti i granteve për zhvillimin e shkollave

Më 14 qershor MAShT ka nënshkruar me KEC marrëveshjen për realizimin e një komponente të projektit të Bankës Botërore për zhvillimin e institucioneve arsimore. Me financim të Bankës Botërore, gjatë 19 muajve vijues rreth 151 shkolla fillore dhe të mesme të Kosovës do të përfitojnë përkrahje financiare për implementimin e projekteve shkollore të cilat kanë për qëllim rritjen e cilësisë në arsim. Roli i KEC do të jetë ofrimi i ndihmës profesionale shkollave në hartimin e planeve zhvillimore dhe projekt propozimeve të cilat do të mbështeten financiarisht nga Banka Botërore. Po ashtu, shkollat do të aftësohen për të monitoruar implementimin e projekteve të tyre si dhe vlerësimin e impaktit të projekteve në ngritjen e cilësisë në arsim.

Deri më tani në kuadër të këtij projekti janë implementuar një numër i konsiderueshëm i aktiviteteve në kuadër të projektit të granteve për zhvillimin e shkollave. Në fillim të muajit korrik janë angazhuar tetë bashkëpunëtor profesional të terrenit (BPT), të cilët do të ndihmojnë Drejtoritë Komunale të Arsimit në përzgjedhjen e 151 shkollave në mbarë Kosovën, të cilat do të përfitojnë grante nga projekti për zhvillimin institucional të arsimit. Po ashtu, BPT-të do të kujdesen që shkollat përfituese të përgatisin dokumentacionin e nevojshëm për fitimin e granteve në përputhje me kriteret e përcaktuara nga Banka Botërore. Në Prishtinë, BPT është vendosur në lokalet e KEC, ndërsa BPT e Pejës, Gjakovës, Ferizajit dhe Gjilanit janë vendosur në Qendrat Didaktike të shkollave përkatëse. Në komunën e Mitrovicës, BPT është vendosur në një zyrë afër shkollës Nëna Teresë, ndërsa BPT në Prizren pritet që të sistemohet në lokalet e reja të DKA-së. Gjatë muajit korrik, BPT kanë mbledhur informacion rreth statistikave të shkollave, të cilat do të përdoren gjatë përzgjedhjes së shkollave përfituese.

Më 26-27 gusht 2010 është mbajtur trajnimi për trajnerë për programin Plani Zhvillimor i Shkollës. Pjesëmarrës në trajnim ishin BPT-të si dhe drejtorë e mësimdhënës, të cilët do të aktivizohen për mbajtjen e trajnimeve për shkollat përfituese. Në fund të muajit Gusht, BPT kanë vazhduar me mbledhjen dhe korigjimin e statistikave të shkollave.