Personi kontaktues: Jehona Shala

Avancimi i Pjesëmarrjes dhe Përfaqësimit të Grupeve të Pakicave Etnike në Arsim

Projekti “Avancimi i Pjesëmarrjes dhe Përfaqësimi të Grupeve të Pakicave Etnike në Arsim” (APREME) ka filluar të zbatohet në maj të vitit 2009. Ky projekt financohet nga Komisioni Evropian me seli në Bruksel dhe Instituti për Shoqëri të Hapur me seli në Budapest. APREME është projekt rajonal ku marrin pjesë 6 shtete të Ballkanit Perëndimor. KEC nga Kosova është implementues i këtij projekti, ndërsa partnerë në zbatimin e projektit janë: Fondacioni i Shoqërisë së Hapur, Shqipëri; proMente – Hulumtim Social, Bosnjë dhe Hercegovinë; Rrjeti i Qendrave për Politika Arsimore (NEPC), Kroaci; Grupi MOST, Serbi; dhe Qendra për Arsim 2000+, Rumani, në cilësinë e ekspertit nga BE.

Edhe pse projekti zyrtarisht ka filluar të zbatohet në maj 2009, organizatat partnere, me ndihmën e Institutit për Shoqëri të Hapur, janë takuar fillimisht në dhjetor 2008 në Bukuresht, Rumani. Gjatë takimit dy ditor u diskutuan në detaje të katër komponentat e projektit, aspekti financiar dhe përgjegjësitë e partnerëve në kuadër të projektit.
 

Projekti merret me avancimin e pjesëmarrjes dhe përfaqësimit të pakicave etnike në sistemet e arsimit në shtetet e Ballkanit Perëndimor duke i promovuar praktikat e mira dhe duke i përkrahur iniciativat lokale. E gjithë kjo bëhet në kuadër të objektives së përgjithshme të projektit, e që është “të kontribuohet në ndërtimin e sistemeve arsimore gjithëpërfshirëse në shtetet e Ballkanit Perëndimor që promovojnë qasje të barabartë në arsimin cilësor për të gjithë dhe janë model për respekt ndaj diversitetit etnik”.
 

Rezultatet e pritshme të projektit janë:
1. Rrjeti funksional rajonal për avancimin e gjithëpërfshirjes arsimore është ndërtuar
2. Informata relevante mbi pjesëmarrjen dhe përfaqësimin e grupeve të pakicave etnike në nivel shkolle në dispozicion
3. Praktikat e mira për sigurimin e pjesëmarrjes dhe përfaqësimit janë mbledhur dhe shpërndarë
4. Iniciativat lokale për përmirësimin e pjesëmarrjes dhe përfaqësimit janë inkurajuar
 

Aktivitetet e zhvilluara

Pas fillimit të projektit, secili partner emëroi koordinatorin e vet dhe atë si në vijim: KEC - Jehona Shala, menaxher i projektit, Nora Tafarshiku, menaxher financiar; OSFA – Mimoza Gjika; NEPC – Eli Pijaca; proMente – Esad Bratovic; MOST – Snjezana Mrse; CEDU 2000+ – Mihaela Truca.

Gjatë takimit të parë virtual të grupit drejtues të projektit u caktuan pjesëmarrësit në Konferencën “Konsolidimi i partneriteteve në mes të organizatave të shoqërisë civile dhe autoriteteve publike në ngritjen e të drejtave të pakicave në regjion”, të organizuar nga Komisioni Evropian. U diskutua edhe plani i veprimit për gjashtë muajt në vijim, si dhe u mor vendim që dy ekspertëve nga Rumania tu bashkëngjitet edhe një ekspert me përvojë nga Britania e Madhe.
Konferenca “Konsolidimi i partneriteteve në mes të organizatave të shoqërisë civile dhe autoriteteve publike në ngritjen e të drejtave të pakicave në regjion” u mbajt më 6 dhe 7 korrik në Bruksel. Projekti APREME u përfaqësua me 4 pjesëmarrës nga shtetet partnere.

Është krijuar ueb faqja e projektit www.apreme.net ku mund të gjenden informatat bazë për projektin dhe e cila do të freskohet me informata të reja gjatë kohë-zgjatjes së projektit.

Më 1, 2 shtator është mbajtur takimi i hulumtuesve në kuadër të komponentës 2 të projektit “Hulumtimet kombëtare” kur morën pjesë nga një përfaqësues/hulumtues prej secilit shtet partner si dhe dy ekspertë nga Rumania e një nga Britania e Madhe. Gjatë takimit u diskutua në detaje komponenta 2 e projektit dhe u caktuan përgjegjësitë dhe afatet deri në përfundim të aktiviteteve për të. Deri më tash, është hartuar korniza për hulumtim dhe janë përfunduar hulumtimet në terren. Gjatë janarit do të mblidhen raportet nga shtetet partnere që do të shfrytëzohen për një sintezë të përbashkët të hulumtimeve.
“Praktikat më të mira” komponenta 3 e projektit – janë emëruar ekipet kombëtare të cilat do të merren me mbledhjen e praktikave më të mira sa i përket përfaqësimit dhe pjesëmarrjes së pakicave në shtetet përkatëse. Është hartuar edhe korniza për mbledhjen e praktikave që ka qenë ndihmesë e madhe për ekipet kombëtare. Në janar përfundon afati për mbledhjen e praktikave dhe secili shtet do t’i zgjedh 3 praktikat më të mira të cilat do të botohen në një libër.

Ky projekt financohet nga Bashkimi Evropian

Për më shumë informata:

www.apreme.net